Badia ma ngolum ( Yohannes 9 : 1 - 7 )

1. “Asa porsea hamu, Jesus do Kristus, Anak ni Debata; jala asa hamu angka na porsea i dapotan hangoluan marhitehite Goarna” (Joh 20 : 31), i do ianggo sangkap dohot tujuan ni barita nauli nasinurathon ni si Yohannes. Asa sahat tu tujuan i, dibaritahonma angka tanda halongangan na pinatupa ni Jesus dohot angka poda napinodahonNa tu angka na torop. Molo pinatudos tu panurat evanggelium na asing (Matius, Markus, Lukas) boi do taida na so pola nonor disurathon hombar tu parmasana angka barita na masa dohot angka tanda halongangan i. Jala ido na sasintongna, ai ndang na manurat barita na masa be si Yohannes. Ndada songon panurat reportase taringot barita na masa nasida. Alai na naeng pabotohon pangulaon ni Jesus, na pamalumhon ragam ni sahit, paluahon halak na targogot jala patingkoshon pangantusion taringot tu patik ni Debata do. Laos marhite na mambaritahon pangulaon ni Jesus ido panindangion haporseaon nasida taringot tu Jesus Sipaluai. Laho patuduhon haluaon na binoan ni Jesus tu hajolmaon i, dipabotohon panurat evanggelium Johannes on ma huaso ni Jesus maradophon nasa sahit dohot nasa huaso na mambahen parsahiton ni jolma. Dipatuduhon do paboa na manghorhon do haroroni manang kehadiran ni Jesus tu nahumaliangsa. Molo disi Jesus mian, maringanan manang ro manopot sadasada halak manang punguan sai na jumpang ma halongangan isara ni hamamalum ni sahit dohot haluaon sian ragam parungkilon. Nasa pambahenan ni Jesus, HataNa dohot pangulaonNa i do na manghorhon haluaon tu angka na porsea di Ibana. Lapatanna, molo disi mian Jesus jala molo disi tarbege HataNa, na marhuaso do i patupahon haluaon dohot patupa hamamalum ni nasa parsahiton.

2. Adong tolu horong dalan dibahen Jesus laho pamalumhon sahit. Parjolo, dipamalum marhite pangidoan ni halak na marholong ni roha tu na marsahit i. Dipamalum do boru ni si Jarius (Luk 8:40-56), sada dakdanak na solpoton (Luk 9:37-45), suang songon i naposo ni letnan i (Luk 7:1-10). Ndada boru ni si Jairius, manang dakdanak na solpoton i, manang naposo ni letnan na solpoton i na ro tu Jesus, alai halak na asing do, natorasna manang uluanna, na marholong ni roha jala na masihol dihamamalum ni sahit i Marhite sihol ni roha dohot haporseaon nasida i ma dioloi Jesus pangidoan nasida laho pamalumhon sahit i. Paduahon, marhite na mangoloi pangidoan ni na marsahit i sandiri. Adong do na ro tu Jesus mangido asa jumpang hamalumon ni sahitna, isarana parompuan naung sampulu dua taon marsahit bulan (Luk 8:43-48), na huliton (Mat 8:1-4). Na marsahit i sandiri do na ro tu Jesus jala ala haporseaon nasida tu Jesus gabe dilehon hamalumon ni sahitna. Patoluhon, hamamalum ni sahit ni na marsahit i ndada ala na pinangidona alai ala na asi do roha ni Jesus marnida na marsahit i gabe dipamalum sahitna (Luk 13:10-17; Luk 14:1-6). Ndang apala piga dibaritahon di evanggelium Johannes taringot angka na marsahit na pinamalum ni Jesus martimbanghon na sinurat panurat evanggelium na asing, lumobi na sinurathon ni si Lukas. Tolu ma barita hamamalum ni sahit na pinatupa ni Jesus di buku Evanggelium ni si Yohannes {Yesus menyembuhkan anak pegawai istana (Yoh 4 : 46-54); Penyembuhan di kolam Betesda (Yoh 5:1-18); Penyembuhan orang yang buta sejak lahirnya (Yoh 9:1-41)}.

3. Diparadalanan ni Jesus dohot siseannNa, pajumpang nasida dohot sahalak na mapitung tubu. Torop do na mapitung tubu di halak Jahudi na jolo, ala hurang diramoti natorasna haiason ni osoposo i ditingki tubu. Ndang diantusi sisean i dope na boi do songgop sahit tu sada halak ala kelalaian mangaramoti hahipason. Ala ni ma disungkun nasida, ”ale guru, ise do na mardosa, halak on do manang natorasna, umbahen mapitung tubu ?” (ayat 2). Sungkunsungkun ni sisean i ala adong dope pemahaman nasida molo songgop haporsuhon manang parsahiton tu sasahalak, uhum ni dosana do i manang ala dosa ni natorasna. Laos pemahaman na songoni do na adong jala berkembang di alam pemikiran ni halak Jahudi hatiha i. Dialusi Jesus do sungkunsungkun i marhite pandohan ”ndang alani dosana manang dosa ni natorasna (ayat 3). Artina, dipaingot tuhan Jesus do angka siseanNa i aa unang pamurahu manguhumi dohot marnida hahurangan ni donganna. Na naeng dohononNa disi, ”ringkot do mananda diri, ai hamu pe pardosa do”. Jadi laho paingothon jolma na sai pamurahu mamilangi, mamunteni, mengkritik dohot manguhumi hahurangan ni dongan. Majotjothu do jolma sai holan mamareso ulaon ni donganna hape bangkol manangkasi dohot mananda dirina (bd. Mat 7:3 ff). Diayat 5, didok Jesus do, ” Panondang ni portibion do Ahu, tagan di portibion Ahu”, nanidokNa disi molo dijangkon do Jesus gabe panondang ni ngoluna, ndang muramura manguhumi, mamunteni, mengkritik dongan, dna. Unang gabe lalap jolma i menganalisa, memperdebatkan dohot ai manangkasi hape ndang berbuat manang bertindak. Tingki sisaonari do berbuat. Dilehon do arian asa mangula, dilehon do borngin asa maradian. Marlao ro do ari i jala ingkon marujung ulaon i. Ingkon ulahonon ni Jesus do ulaon na jinaloNa sian Debata Ama andorang sahat Ibana tu silang i (ayat 4). Binsan dilehon dope kesempatan/partingkian laho mangula, ingkon ulahonon do i jala unang lalap manungkun dohot memperdebatkan. Ibana do Panondang ni portibion tagan d portibi on Ibana, ndang na mandok terbatas hapanondanganNa. Hot do bana panondang portibion alai kesempatan ni ngolu ni jolma dohot ulaonna di portibion maradophon Panondang i terbatas do. Alani i binsan adong kesempatan pajumpang dohot Panondang i, tajalo ma Ibana. Molo niida na marsahit manang na marstaonon unang sungkun ala ni aha dohot unang uhumi alai sungkun ma ”aha do sibahenonku tu halak on?” songon hapataran ni ulaon ni Debata/ Harajaon ni Debata (ayat 3). Jadi parjumpangan ni Tuhan Jesus dohot sahlak na mapitung tubu i, ndada laho mangalusi sungkunsungkun boasa manang alani aha mapitung ibana alai naeng papataron ni Jesus habalgaon ni Debata tu na mapitung i. Parjumpangan ni na porsea i tu na marsahit dohot na martihas nang dohot na marsitaonon ima laho papataron habalgaon ni Debata. Jad dalan ni Deata do molo pajumpang angka na porsea i tu angka na marsitaonon, martihas, na marsahit, manungguli laho patupahon na denggan songon hataridaan habalgaon ni Debata.

4. Dung dipinsang Tuhan Jesus siseanNa i, ditijuri ma tano i mambahen gambo dingi didalohon gambo i tu mata ni na mapitung i. Disuru ibana marsua tu dano Siloam gabe marnida ma alai ndang porsea angka hombar bagasna naung marnida na mapitung tubu i (ayat 6-9). Dua hali Jesus mamangke tijur laho pamalum na marsahit (bd. Mark 7:33). Ndang alani tijur manang gambo na martijur i gabe malum na mapitung tubu i. Marhte na mamangke cara na songoni dipahibul Tuhan Jesus pos ni roha di na mapitung i. Tarida do panghorhonna, pos do roha ni na mapitung i di Jesus, ai unduk do ibana laho marsuap tu dano Siloam. Jadi godang do panghorhon pos ni roha di na marsahit di pangubation na jinalona. Ndada tijur dohot gambo i na pamalumhon na mapitung tubu i alai pos ni rohana dohot pangoloionna di Jesus do. Haporseaonna do na pamalumhon ibana sian hapitungon i. Jadi molo porsea hita di Jesus gabe Panondang ni ngolunta bolong ma sian hita hagangguon, bangko na patigortigor diri songon halak Jahudi i, bangko na sai mangalului hahurangan, manguhumi dohot na mamunteni dongan. Molo dung di sondangi Panondang i hita, oloanta ma Ibana. Pangoloionta tu Ibana marhite patupahon na denggan tu dongan. Pajangkononta di Ibana do na mangoonjar hita mananda hapitungon n rohanta jala ido na mangonjar hita mangido hamalumon ni hapitungonta i.

5. Torop do nuaeng on halak na dibagasan parsahithon na tongtong masihol dihamamalum ni sahitna. Adong sahit i na boi ubaton, ala laos adong do na so boi ubatan. Jala tung pe boi ubatan, mansai maol situtu hilalaon ala arga ni ubat dohot pangubation. Alai nang pe songoni sai dilului jolma na marsahit nang keluargana do dalan songon dia asa boi malum sahitna. Manang boha pe argana, manang ingkon gadison nama arta asa adong hepeng parubatan, tongtong diusahahon asal ma malum sahit i. Ndada holan tu dokter manang tu rumah sakit na adong diluat on laho mangalului hamamalum ni sahit i sahat do tu Penang, Malaka, dna. Molo tapatudos na diturpuk on tu pangaluluon ni jolma sinuaeng manjalahi hamalumon ni sahit na, dohononta ma basana i Tuhan i, didodo jala didadap do holso ni na marsahit i. Tutu do Ibana pandaoni bolon. Boasa ro Jesus tu na mapitung tubu i so manang dipangido jala ndang ditanda Jesus ? Alusna ala di boto Jesus do harohaonna, unduk dohot serep ni rohana. Di boto Jesus sitaononna dohot sihol ni rohana. Gabe asi ma roha ni Jesus. Tarlumobi ma naeng diajari Tuhan Jesus angka siseanNa i asa unang sai mangalului ”aha do alana” mapitung tubu alai na rumingkot asa dohot nasida papatarhon Harajaon ni Debata marhite parulaonna (”aha do sibahenonhu tu ibana”). Godang halak na marsahit ditingki on dung loja marubat tu sada dokter, pinda muse tu dokter na asing. Sian sada rumah sakit pinda muse tu rumah sakit na asing. Mulana pos do rohana digogo ni tangiangna. Dipangido do nang pandita manang parhalado manangianghon ibana, alai tong do ndang gira malum. Dungi laho ma ibana marubat alternatif. Alai ujungna ndang ubat na pinangkena i be na alternatif, ai dilului ibana ma debata na alternatif, na dirajumi ibana boi pamalumhon sahitna. Ido na pinatupa ni halak angka na mangido hamalumon ni sahit sian Datu pangulpuk, na manabasnabas tambar sipangkeon dohot ragam ni ruhutruhut sidalanhononna. Gabe marlaok ma haporseaonna tu sihapelebeguon. Turpuk on patuduhon tupa ndang sai manigor jumpang hamamalum ni sahit i. Alai molo benget roha manaon sitaonon ala ni sahit i. Jala manghirim hita tu Tuhan i, sai na ro do Ibana mangalehon hamalumon ni sahit. Naeng ma tapangke ariari na nilehon ni Debata gabe tingki pangulaon mangula lomo ni rohaNa, papatarhon habalgaon ni Debata marhite pangulaon na denggan tu angka dongan. A m e n