1 Kronika 16 : 7 - 12

1.Mingguta di tingki on margoar Kantate, lapatanna “Endehon hamu di Jahowa ende naimbaru” (Psalmen 98:1a). Disosoi goar ni minggu on do tu hita asa tapasahat pujipujian tu Jahowa. Laos i do napinangido ni Debata tu hita marhite turpuk on jamita dimingguta sadarion.
Nunga tardok demak (aman) luat, nunga dipauli Raja David na margoar hutana na songon ibukota ni Harajaon Israel ima Jerusalem. Nunga dipauli undungundung inganan n Poti Parpadanan. Sanga do songon na tondan parpinda ni Poti Parpadanan i tu huta siala parmate ni si Usa tingki na paorothon sian Kiryat Jarim (1 Kronika 13:9-10). Gabe tu jabu ni si Obed Edom Poti Parpadanan i. Dung 3 bulan lelengna Poti Parpadanan i di bagas ni si Obed Edom, saut ma dipabongot tu undungundung na pinaulina i. Dung ojak Poti Parpadanan i di undungundung i dipamasa angka las ni roha bolon marhite na pasahat pelean dohot pujpujian parolopolopon nangkupan ni angka ende naniuluhon si Asap songon parhalado.
2 bagian na naeng tapahusohusor jala tahangoluhon marhite turpuk on :

2.Tapuji ma Tuhan Debata. On ma na parjolo.
Marende bangso Israel mamujimuji Debata laho pasahathon hamauliateon ni rohana ala naung sahat Poti Parpadanan i tu undungundung i. Poti parpadanan i do hataridaan, simbol dohot jaminan kehadiran ni Debata ditongatonga bangsoNa. Alani i sai tarpasupasu do halak/keluarga/bangso na gabe inganan haojahan Poti Parpadanan i (patudos tu keluarga ni si Obed Edom) alai manghorhon uhum do i tu angka na leas rohana maradophon Poti Parpadanan i (patudos tu si Usa). Molo mian Debata ditongatonga nasida sonang jala marlas ni roha do Israel. Alani do marende nasida mamujimuji Debata. Ido salah satu na patuduhon hamauliateon ni roha nasida di pambahenan ni Debata.
Namangonjar roha nasida pasahat pujipujian mauliate ni roha, ima marningot jala manghilalahon basabasa ni Debata. Basabasa ni Debata do boi sahat Poti Parpadanan tu Yerusalem. Alani i songon bangso Israel na marlas ni roha jala marolopolop ala naung ojak Poti Parpadanan i ditongatonga nasida di Jerusalem tama ma nang hita marlas ni roha jala marolopolop mardongan pujiapujian siala rade Debata ro tu tongatonganta di portibion marhite Jesus Kristus.
Boi do marragam cara pamujionta tu Debata, isarani marhite ende, marhite parsidohoton di angka ulaon ditongatonga ni huria, nang marhite pambahenan ni ngolunta siganup ari. Boasa tama ingkon pujion Debata ? Marragam do alusta. Ganup halak ra pasahathon pujipujian tu Debata hombar tu angka pasupasu najinalona be. Manghilalahon dohot manghamauliatehon basabasa ni Debata ido hataridaan ni ngolu na markantate. Pinarhatopot pangurupion ni Debata. Sian ngolu na songoni do tubu roha na ringgas manghamaulitehon basabasa ni Jahowa. Binoto mandok mauliate ala pinarhatopot pangurupion ni Jahowa na mambahen las roha di ngolu on.
Tapasahat pujiujian dohot hamauliateon ni rohanta tu Debata marhite ende dohot pelean na marragam i ndada alani jolma, ndada ala ni aturan manang ala utang naso tarjua manang ala adong upah sihirimon sian Debata alai ala basabasa ni Debata dohot silehonlehon ni Debata di ngoluta on do. Hamauliateon ima parbue ni haporseaon. Molo tarajumi do ngolunta on dohot na adong dihita silehonlehon ni Debata manang basabasa ni Debata dipaingot do hita asa mamujimuji Debata marhite ende pujian dohot ragam hamauliateon nang marhite panggulmiton ni ngolu.

3.Lului ma Jahowa jala baritahon ma pambahenan ni Debata di ngolunta.. On ma na paduahon..
Disosoi do Israel asa mangalului Jahowa dohot marpanindangion mambaritahon nasa pambahenan ni Debata marhite pandohan diayat 8b, 9b + 11 na mandok “sisiri hamu ma Jahowa jala lului hamu ma bohiNa”, “pabotohon hamu ma di tongatonga ni angka bangso angka pambahenanna i”. “marnonangi ma hamu taringot tu halongangan angka na binahenna i sudena”
Molo disosoi bangso Israel asa “mangalului Jahowa” ndada na mandok “na mago Debata umbahen niluluan. Alai asa diingot bangso i do nasa pambahenan ni Debata di ngolu nasida songon sada bangso dohot pandonganion ni Debata di ngolu nasida ganup marsadasada. Marhite namarningot nasa pambahenan ni Debata gabe lam porsea dohot pos roha ni bangso i di Debata, laos boi ma nasida mamujimuji huhut mandok mauliate tu Debata dohot mambaritahon manang manghatindanghon nasa pambahenan ni Debata i tu saluhut bangso.
Kehadiran ni Poti Parpadanan i mangalehon pos ni roha di nasida. Kehadiran ni Poti Parpadanan i patuduhon hasetiaon ni Jahowa di padanNa i. Haporseaon dohot pos ni roha di Tuhan i tapapatar marhite parngoluan na so ganggu manang ndang lomos marTuhanhon Debata Jahowa. Hasetiaon ni Debata na tongtong mangaramoti ngolunta mangidohon sian hita hasetiaon manghaposi Ibana dohot mangulahon HataNa huhut mamaritahon manang manghatindanghon nasa pambahenan ni Debata di ngolunta.
Godang do pambahenan ni Debata tu Israel mamungka sian tano Misir, diparhorsihan nang dung sahat tu tano Kanaan. Songon nang dipardalanan ni ngolunta ganup marsadasada ragam do pasupasu ni Debata, pandonganion ni Debata dipardalanan ni ngolunta. Pandonganion, panarihonon dohot pasupasu ni Debata ido sibaritahononta manang sihatindanghononta tu sandok tano on asa ditanda portibion do na Jahowa do Debata, nampuna jala namarhuaso di portibion huhut na mangalehon haluaon.
Huria na mangolu ima huria na sintong marbarita nauli (marturya). Alani tarjou do huria i mamboan barita nauli tarlumobi tu angka na so mananda haluaon i dope. Nunga adong nian angka parhobas na tarpillit napinaojak mangulahon i alai songon pamatang ni Kristus, sude do ruas ni huria i, angka na porsea i tarjou mangulahon i, ndada ingkon marhite jamita (verbal) alai tarlumobi ma marhite ngolu (parange dohot pambahenan). Bahkan lebih efektif do jamita na marhite pangulaon i, ai ido na langsung patar diida jolma na torop i, ido hataridaan huria na mangolu dohot ruas ni huria na na lam martumbur jala lam matoras.
Jadi ingkon marpanindangion do angka na porsea i marhite panggulmiton ni ngoluna, disude partingkian dohot inganan. Alani i taingot ma denggan basa ni Jahowa jala tapasahat ma pujipujian hamauliateon ni rohanta holan tu Ibana huhut ta baritahon ma nasa pambahenanNa di ngolunta. A m e n.