LUKAS 10 : 25 – 37 (GABE DONGAN JOLMA TU NA ASING )

1.Gabe dongan jolma tu na asing (Menjadi Sesama Bagi Yang Lain). Marmula sian panghataion teologis (wacana teologis) na pinasahat ni Siboto Patik taringot tu makna hangoluan salelelenglelengna ima hangoluan “na naeng ro” dohot “disan” (kehidupan “nanti” dan “disana”) alai marujung di sada ulaon/tindakan na praktis na boi pintor nihilalahon jala nialaman ni dongan jolma “sadarion/nuaeng” (kini) dohot “dison” (disini). Ndang olo Jesus i terpancing jala terjebak di perdebatan teologis na so marimpola. Migor langsung do Jesus i “mendaratkan” panghataion i, lumobi di na manaringoti “ise do dongan jolma i ?” Narumingkot tu Jesus ndada “ise” alai “boha” manang “songon dia” (“bagaimana”) hita boi gabe dongan jolma tu manang ise pe dohot didia pe.

2.Ayat 25-29. Disungkun sahalak Siboto Patik do Jesus taringot tu syarat-syarat laho manean hangoluan salelenglelengna. Sungkunsungkun na sarupa muncul do nang di Lukas 18:8 dohot Matius 22:35. Dua do sangkap ni Siboto Patik, ima manungkun sada hal na so binotona jala manungkun mardongan sangkap asa diboto ibana Guru na songon dia do Jesus i. Isi ni sungkunsungkunna manaringoti “hangoluan salelenglelengna” ndang manaringoti patik ni Debata. Dialusi Jesus do ibana marhite sungkunsungkun, “aha do natarsurat dipatik i? jala aha do najinaha ho disi?” Huroha tangkas do dijaha gabe diingot Siboto Patik i najinahana, pintor hatop do dialusi, “ingkon dihaholongi ho do Tuhan Debatami sian nasa ateatem, sian nasa tondim, sian nasa gogom dohot sian nasa roham, jala donganmi songon dirim” Manghaholongi Debata sian na 4 (opat) unsur on (tondi, ateate, gogo dohot roha) mangondolhon asa dihaholongi jolma i Debata sian sandok ngoluna. Manghaholongi Debata ndada holan di simanghudap alai dohot do marhite pambahenan. Laos songoni do na manghaholongi dongan jolma, naeng ma patupaon i songon na manghaholongi diriniba sandiri. Sada singotsingot do on tu na masa hatiha i, di na torop ahli teologia Jahudi na mangajarhon patik marhite dalan na lilu. Diajari nasida do patik manghaholongi sian dalan na terpaksa jala ndang sian nasa roha dohot ateate. Totalitas ni hajolmaon do na naeng manghaholongi Debata dohot dongan jolma doshon diriniba sandiri. Nang pe tingkos dialusi Siboto Patik i dohot alus na lengkap, alai ndang haruar sian sandok hadirionna, ai holan na malo mangapil do ibana. Ido umbahen dialusi Jesus muse, “tingkos do alusmi, ulahon ma songoni asa mangolu ho” Naeng paboahon ni Jesus do marhite pandohanNa i, alusna i do na gabe ojahan asa teanonna hangoluan salelenglelengna. Alani i asa unang holan mangapil patik Siboto Patik i alai dohot ma mangulahonsa. Alai tong do mamintori diri Siboto Patik on marhite sungkunsungkun, ise do donganhu jolma? Ra diboto Siboto Patik on do ise do donganna jolma alai sikap dohot pambahenan nasida ndang songon na niharaphon Jesus. Diantusi nasida do patik ni Debata alai dilului nasida dalan laho mamintori dirina. Sungkunsungkun ni Siboto Patik on, ise do donganhu jolma ?, sasintongna sorminan roha dohot sikap na mamintori diri. Boi do adong roha dohot sikap ni jolma na jotjot mamintori diri nang pe naung diboto hata nang pambahenanna naung salah. Sadar do ibana naung salah di hata nang pambahenanna alai ndang adong pangokuhonon dohot roha laho paubahonsa alai dilului dalan laho manutupi hasalahan manang hahurangan i dalan laho mamintori diri. Alani i lam tapauba ma rohanta asa ndang mamintori diri. Sian sungkunsungkun Siboto Patik on adong asumsi na tersembunyi ima mambahen pembedaan-pembedaan ni jolma. Adong do jolma na pantas dohot layak digoari dongan jolma jala adong na so patut digoari dongan jolma. Artina nang ni ida jolma i alai ndang gabe otomatis jolma na ni ida i gabe dongan jolma. Nunga dibuktihon pardalanan ni sejarah di portibion, jotjot masa pembunuhan dohot parporangan ala perbedaan suku, etnis, agama dohot tembok-tembok pemisah na asing( Contohna : apartheid na masa ni Afrika Selatan, di Irak dohot suku Kurdi, di Indonesia pigapiga taon naung salpu masa do parbolatan dohot parsalisian antar suku, ras dohot etnis nang agama). Marhite alasan parasingan/perbedaan alani agama, warna kulit, suku, ras dohot na asing, sahalak jolma diperlakuhon marasing, mardingkan jala boi do masa mangangohon hosa ni sasahalak alani i. Jadi, boni ni sikap primordialisme dohot pangantusion eksklusivisme do sungkunsungkun ni Siboto Surat i, na patupahon pembedaan-pembedaan ni jolma siala agama, suku, etnis, ekonomis dohot politis, dna.

3.Ayat 30-37. Laho mangalusi Siboto Patik na manungkun manang ise do dongan goaron, ditariashon Jesus ma sada umpama taringot tu halak Samaria na asi roha. Umpama on dibuat do sian peristiwa na somal masa di dalan balobung na marbahaya. Adong 5 (lima) halak tokoh di umpama ni Jesus on. Naparjolo : sada halak, na tuat sian huta Jerusalem laho tu huta Jeriko, na nisamun panamun; dipupusi ibana, dipukpuhi jala matemate ne do ibana ditadingkon. Ndang apala tangkas binoto ise do na nisamun on alai pigapiga catatan mandok ia jolma na nisamun panamun on ima sahalak Jahudi na tuat sian huta Jerusalem laho tu huta Jeriko, na marhira 27 kilometer (17 mil) daona, marbatubatu do dalan i alani i ndang adong suansuanan huhut gok padang pasir jala adong dalan na menurun/terjal marhira 1200 m (3300 kaki) na ingkon sidalanan. Di zaman Alkitab, digoari do dalan on :”dalan na gok mudar” (jalan berdarah) ala ndang aman, godang panamun martabuni di dolokdolok batu dihumaliang ni dalan on na laho manamun na mamolus dalan on. Napaduahon dohot napatoluhon ima sahalak malim dohot sahalak Lewi na mamolus inganan i alai ndang olo mangurupi jolma na nisamun i huhut dilaosi ibana do. Malim dohot halak Lewi on mulak sian panghobasion di Bagas Joro na di Yerusalem. Mangihuthon Taurat ndang jadi nasida maniop bangke ni jolma (bd. Imamat 21:1; Bilangan 19:11). Anggo dilaosi nasida do i gabe ramun ma nasida alani i ingkon mangulahon ulaon pangurason ma nasida saminggu lelengna jala ndang boi marsaor dohot na torop andorang so salpu masa pangurason i jala ingon manggarar biaya penguburan anggo dijama nasida do jolma na nisamun i. Hape jolma na nisamun i ndang dope mate. Na mabiar disamun do malim dohot halak Lewi on manang alani hamalimon dohot halewion nasida i songon pemuka ugamo ni Jahudi gabe ndang olo mangurupi na hona samun i. Na pasti ndang marasi ni roha nasida, dilaosi do na hona samun i huhut ditorushon nasida pardalananna. Napaopathon ima sahalak Samaria. Halak Samaria on ma na gabe fokus di umpama ni Tuhan Jesus di turpuk on. Halak Samaria ima pomparan ni bangso Israel naung marsaripe tu halak na ro na mian di harajaon Israel Utara dung lengse huta Samaria di taon 722 sM (bd. 2 Raja-raja 19:36-38). Dihasogohon halak Yahudi do halak Samaria songon halak dagang na “satonga keturunan” di pardagingon dohot di partondion. Ndang donganna jolma halak Samaria dietong halak Jahudi. Naung marburakburak do parmusuhan ni halak Jahudi dohot halak Samaria (bd. Yoh 4:9). Jebu do parsalisian nasida i, hape halak Samaria diturpuk on do naumboto holong ni roha tu na nisamun i. Penuh perhatian do halak Samaria on tu na hansitan i, ndang disungkun ibana ise do jolma na nisamun i, halak Jahudi do manang halak Romawi, dna. Na pasti asi rohana marnida na nisamun i jala donganna jolma do na nisamun i, na ringkot diurupi. Diparade halak Samaria on do tingkina dohot gogona laho mangurupi korban ni panamun i, dipasahat ibana rupia dua biaya pangubation jala rade manamba i dana/biaya i molo hurang tu nampuna bagas penginapan i. Napalimahon ima nampuna bagas penginapan. Nampuna bagas on pasti do mananda halak Samaria i ala jotjot ro tu inganan i. Parsaoran na marojahan di pos ni roha ni halak Samaria on tu nampuna bagas i umbahen dilehon ibana dua rupiah laho pauliulihon manang merawat korban na nisamun i. Jala nampuna bagas i pe pos do rohana di halak Samaria i, na ro do muse ibana tu bagasna.

4.Sude do hita manghirim asa dohot gabe panean di hangoluan salelenglelengna. Hangoluan salelengleleng ndada manaringoti ganjang ni umur/asa leleng mangolu (secara kwantitas), ndada holan manaringoti ngolu di ari sogot (surgo) alai manaringoti kwalitas parngoluan do ima namanghaholongi Debata sian nasa roha dohot ateate, nasa gogo dohot tondi huhut manghaholongi dongan jolma doshon diriniba. Mangihuthon umpama ni Jesus on “gabe dongan jolma tu na asing”. Artina haporseaon dohot pangoloion nang haholongon tu Debata ingkon marparbuehon asi ni roha tu dongan jolma na gale, somardihadiha, naginosagosa, na marsitaonon, dna (bd. Poda 14:21
Matius 25:40). Targoar halak Samaria on na asi roha ala dipatuduhon ibana do asi ni rohana i tu angka naginosagosa, na parir parniahapanna. Asi ni rohana i ndada holan marojahan di panghilalaan sambing dohot ndada di panghataionna alai dipatuduhon marhite pangulaon/pambahenanna na konkret, ndang dipaholang suku, ras, ugamo, horong dohot parbangsoon, nang angka na asing pe. Asi ni roha ni halak Samaria i mangharhari “tembok-tembok pemisah” na mambahen diskriminasi di jolma i. Amen.