LUKAS 10 : 1 – 12

1.Sude Negara na di portibion pabangkithon dohot paborhathon haposan ni rohana gabe duta di Negara na adong hubungan diplomatikna tu Negara inganan pangulaon ni duta i. Di goari do angka duta i, DUTA BESAR BERKUASA PENUH, na mewakili negarana di Negara na tinopotna i.
Tudos tusi do rumang ni parsuruon ni Tuhan Jesus di siseanNa dohot angka na porsea i tu portibion laho patandahon Harajaon Banua Ginjang. Dilehon Tuhan Jesus do tu angka siseanNa I dohot tu angka na porsea i huaso nag ok laho patandahon Harajaon Banua Ginjang i marhite parjamitaon, pahiarhon angka na marahit, pabalihon tondi na hodar, pangoluhon angka na mate dohot paiashon na puru on.
Domu tu ulaon i ma dibaritahon turpuk on ima pamillition dohot parsuruon ni Tuhan Jesus di 70 halak siseanNa, angkup ni sisean na 12 i. Dijou jala dipaborhat Tuhan Jesus do sisean na si 12 i, dohot si 70 halak I laho patandahon Harajaon Banua Ginjang. Adong 4 bagian hasintongan Hata ni Debata marhite turpuk na naeng tapahusor-husor dohot tahangoluhon.

2.Parjolo : Dijou jala disuru Tuhan i do hita mamaritahon Barita na Uli i. Alani i taulahon ma i dibagasan na marsiurupan.
Dijou jala dipaborhat Tuhan Jesus do 70 halak siseanNa i laho patandahon Harajaon Banua Ginjang. Boi do bilangan 70 manggombarhon torop ni bangso di sandok portibion na ginoaranna di bible i (1 Musa 10). Jadi marhite bilangan 70 i dipatuduhon so holan tu bangso Israel dipasahat Barita na Uli i alai dohot do tu sandok bangso di portibion. Hata ni Tuhan Jesus andorang so manaek Ibana tu Banua Ginjang mandok : “Laho ma hamu poda i hamuma saluhut bangso…..” (Mat 28:19).
Dipanjouon ni Tuhan Jesus tu si 12 halak siseanNa i, dipatuduhon ia sisean na 12 i dijou sian tonga-tonga ni jolma sihatoropan, sian ragam ni ulaon dohot hadirion. Si Mateus sian Kantor sijalo beo (kantor pajak), artina mewakili orang kantoran, Si Simon Petrus sian pardengkean (nelayan), artina ibana mewakili parumauma manang non kantoran.
Songoni do nang panjouon dohot parsuruon ni Tuhan Jesus tu si 70 halak i, dijou nasia sian ragam huta, ulaon dohot bangko, asa marhite keberagaman manang parasiagasingan nasida i boi angka sisean i masitumpahan (bekerjasama dohot sama-sama kerja) jala masilehonan solang (saling melengkapi).
I do artina pandohan ni Tuhan Jesus na diayat 1 : “jala duadua nasida disuru”. Disuru sisean na 70 halak i duadua asa boi marsitungkolan dohot marsiurupan mangulahon ulaon na pinasahat Tuhan Jesus tu nasida. Domu tusi do tu nanidok ni apostel Paulus tu huria na di Korintus (1 Kor 12:12-31), “marragam, marasingasing dijalo sisean i talentana be” Parasingasingan i pangkeon tu ngolu na marsiurupan, marsitungkoloan dohot saling melengkapi.
Dijou do hita gabe siseanNa, siihuthon Tuhan Jesus laho mamaritahon barita na uli i. Jadi ulaon marbarita nauli ndada holan ulaon na pinasahat tu angka partohonan manang parhalado alai sude siihuthon Kristus ingkon do mamaritahon Harajaon ni Debata. Dina jinou Tuhan i hita gabe parbarita nauli dilehon tu hita ulaon siganup ari dohot sibasabasa na marragam i. Adong na pegawai, guru, petani/pangula, partigatiga, tukang dohot angka na asing.
Sude ulaon na marragam i diparhasean Tuhan Jesus do gabe mimbar parjamitaan mamaritahon Barita na Uli. Ndada ingkon tatinggalhon ulaon siganup ari asa gabe parjamita hita. Ulaonta siganup ari i pangkeonta mamaritahon Tuhan Jesus. Molo ta pangke ulaon na marragam i dibagasan na marsiurupan, margogo ma hita mangulahon pamaritahonon i.

3.Unang mabiar hita mamaritahon Harajaon Banua Ginjang i nang pe godang angka rintangan dohot angka tantangan. On ma bagian na paduahon.
Diayat 3 didok Tuhan Jesus : “Laho ma hamu! Hira birubiru do hamu husuru tu tongatonga ni angka babiat”. Marhite pandohan i dipaingot Tuhan i do angka iseaNa i godang jala borat do parungkilon di ulaon i Digombarhon Tuhan Jesus do nasida songon birubiru mangadopi babiat. Biru-biru ima dorbia na gale, ndang marsait, ndang martaji jala ndang adong soropna. Na nidok Tuhan Jesus disi ndag adong sipangasahonon ni sisean i maradophon angka babiat i. Hape disuru nasida tu tonga-tonga ni angka babiat na gogo.
Ido gombaran ni ngolu na porsea i di portibion. Tudoshon biru-biru do huria i, ima angka na porsea i, gale ndang boi manuntuk andora ditongatonga ni jolma na manghosomi Tuhan Jesus i. Anggo babiat di portibion nunga lam otik jala lam punah alai pangalaho ni jolma songon pagalaho babiat lam godang. Tudos do i tu ulok. Ulok nunga lam maol tajumpai. Nang pe ulok lam maol tajumpai alai pangalaho na mangulok i lam godang di portibion.
Martimbanghon angka na jahat i, gale do angka na porsea i di gogo ni portibion. Ndang adong sipangasahonon ni angka na porsea i gogo ni portibion. Ndang na so tarbahen Tuhan i pajongjonghon huriaNa di portibion alai ingkon taluhonon do hagogoon ni portibion marhite holong dohot halambohon.
Molo tabereng gumodangan do hasea manang manfaat ni birubiru na gale i sian babiat. Juhutna gabe sipanganon, susuna mangalehon vitamin, imbuluna mambahen pahean wol dohot alashon pamatang. Hape mabiat holan mambahen biar do. Hasea manang manfaat ni biru-biru na sisongoni do na pinangido Tuhan Jesus sian angka siseanNa i I do umbahen didok Tuhan Jesus tu angka siseanNa i: “Hamu do Panondang ni tano on” & “Hamu do sira ni tano on” (Mat 5:13-14). Jadi nang pe godang pambibiari di ulaon parsuruon ni Tuhan Jesus i, dipapos roha ni angka sisean i asa unang mabiar ai donganan ni Tuhan i do na sinuruNa i.
Jotjot do hita mabiar papatarhon hadirionta songon siihuthon Kristus. Mabiar hita ala lupa di bagabaga pandonganion ni Debata. Taingot ma Tuhan Jesus sandiri pe, uju pasahathon parsuruonna tu angka sisean i didok Ibana do, “Sai na donganaKu do hamu rasirasa ro ajal ni hasiangan on”

4.Bagian patoluhon : Disarihon Debata do ngolu ni angka na porsea i. Di ayat 4 didok Tuhan Jesus : “Unang boan hamu hande-hande manang hajut, manang sipatu pe; unang tabe hamu halak di tonga dalan. Pandohan ni Tuhan Jesus on manuanhon pos ni roha di sisean na sinuru i maradophon Tuhan Jesus na marsuru i.
Diorai nasida mamboan bohal asa tung marsigantung nasida tu pandonganion dohot panarihonon ni Tuhan i. Diorai nasida mamboan bohal asa unang adong ni roha isean i panghilalaan ala haboionna marhasil nasida di ulaon na sinuru ni Tuhan Jesus i. Diorai nasida mamboan bohal asa unang tarsabat (terhalang) nasida mangula ulaon i ala mamboan hande-hande.
I do tong lapatan ni ora-ora manabi halak di dalan. Molo ditabi nasida halak di dalan so ma pardalanan ala marganjang ma panghataion, habis tingki manghatai na so ringkot gabe sundat ma mangulaho ulaon na rumingkot.
Marhasil hita di ulaon i molo pos roha di Tuhan i. Marhasil hita di ulaonta molo marsihohot hita manghaposi Ibana. Diparsihohoton manghaposi Tuhan i do kunci keberhasilan ni angka na porsea i. Didok di 2 Kronika 26:5b : “saleleng ibana mangalului Jahowa, manjadi ulaon ni raja i ditumpak Debata”.
Saleleng dilului raja Usia, Debata Jahowa, manjadi do ulaonna. Marumur 16 taon do Usia dipabangkit gabe raja di Israel, ala dilului ibana boi do si Usia 52 taon lelengna manggomgomi Juda.
Alani i, molo naeng marhasil hita mangulahon parsuruon ni Debata manang laho mangula ulaonta, unang tapangasahon hagogoon dohot hapistaranta, alai marhaserepon ma hita jala marhasetiaan huhut mangasahon Tuhan i di ngolunta.

5.Bagian paopathon : Dijou jala diuru Tuhan i hita mamaritahon Barita na Uli marhite parjamitaon dohot pambahenan.
Didok Tuhan Jesus diayat 9 : “Pamalum hamu ma angka na hansitan na disini, dok hamu ma tu nasida : “Nunga sahat Harajaon ni Debata tu hamu” Jadi ulaon ni angka sisean i mamaritahon naung songgop Harajaon ni Debata.
Harajaon ni Debata ndada wilayah kekuasan, alai Debata na marhuaso, marharajaon di roha ni jolma i. Dilehon Tuhan Jesus do tu angka sisean i huaso pamalumhon na marsahit. Ndada holan manjamitahon angka sisean i alai dohot do pataridahon jamita i marhite pangulaon dohot pambahenan.
Ulaon na sisongon i do dipatupa Tuhan Jesus andorang di portibion, ndang holan marjamita Ibana, dipamalum do angka na marsahit
Metode na sisongoni ma na jolo dipatupa I.L Nomensen di tano Batak. Didia jongjong gereja disi do dipajongjong parsingkolaan dohot parubatan. Laos ido naniiuhuthon HChB/HKI na jolo, manang didia jongjong HChB/HKI laos dipajongjong do parsingkolan.
Mangihuthon barita, Nomensen do na mangatur tingki ni onan di Tapanuli najolo, ari Senin di Lintong ni Huta, Selasa di Siborongborong, Rabu di Porsea, ari Kamis di Muara, Jumat di Balige dohot Dolok Sanggul, Sabtu di Tarutung.
Marhite i dipatuduhon, ndada holan marjamita ulaon ni halak Kristen dohot do nang manghobasi parngoluon siganup ari. Jadi parjamitaon dohot pangulaon nang pambahenan ndang boi sirangon. Alani i taingot ma jamitami do ngolum jala ngolumi di jamitam. A m e n.